भालेमुन्ग्रोको गीत

भालेमुङग्रोको गीत

डाँडामाथि बसेर तिम्रो त्यो
उल्लु जस्तो आँखाले
टुलुटुलु के हेरेको?
छैन अब केही पनि मेरोमा,
नाँगो झार छु म
तिम्रो त्यो मिसरी बोलीमा
लट्ठ भएर
भए जति सबै सुम्पिसके तिमीलाई
अब आश नगर मबाट
हिजअस्तीसम्म मेरो एम्पलिफायरमा
माइक लगाई गीत गाउँथ्यौ
आज  त ठुलो मान्छे भयौ होइन!
ठुलो ठुलो कार्यक्रम गर्ने भयौ
ठुलो ठुलो कुरा गर्ने भयौ
जाबो थोत्रो भयौ हामी त
तिम्रो निम्ति आज होईन!
तिम्रो त्यो न्यानो गुँडमा बसेर
लोथर्के दाँत देखाई नगिज्याँउ मलाई
म पनि किन्न सक्छु तिम्रो जस्तो माइक
म पनि गाउन सक्छु
तिम्रो जस्तो गीत
थोत्रो एम्पलिफायर भएपनि
गाउनेछु म गीत
तर साँचो गीत गाउनेछु
भालेमुङग्रो जस्तो होइन।।